Dünən gecə Bakı şəhəri Yasamal rayonu, Mirəli Seyidov küçəsində yerləşən çoxmərtəbəli yaşayış binasında baş verən yanğın, bu tip binalarda yaşayan sakinlərin yanğın risklərinə nə dərəcədə hazır olduqları sualını gündəmə gətirdi.
Məktəblərdə, müəssisələrdə və şirkətlərdə vaxtaşırı keçirilən yanğın təlimlərinə baxmayaraq, müxtəlif vəziyyətlərdə alov və tüstüdən qorunmaq üçün alternativ üsullardan xəbərdar olmağın önəmi bir daha ortaya çıxdı.
Yanğın gözlənilməz və dağıdıcı bir fəlakət olsa da, sakit qalmaq və mütəxəssislərin xəbərdarlıqlarına qulaq asmaq həyat qurtara bilər. Evdar.az yanğınlarda həyat qurtaran qaydaları təqdim edir.
Liftlərdən heç vaxt istifadə edilməməlidir.
Hündürmərtəbəli binalar yanğın təhlükəsizliyi üçün tikilsə də, sakinlərin əşyaları ilə elektrik enerjisi və qaz kimi enerji mənbələri yanğınlara səbəb ola bilər.
Evdə yanğın baş veribsə, təhlükəsiz şəkildə təxliyə üçün cəmi bir neçə dəqiqə var. Buna görə də, təcili vəziyyətdə necə qaçmağı bilmək həyat qurtaran tədbirdir.
İlkin müdaxilə uğursuz olarsa, mənzildən çıxmazdan əvvəl mənzilin qaz və elektrik enerjisinin söndürüldüyünə əmin olun. Yanğınsöndürmə idarəsinə və bina işçilərinə məlumat verdikdən sonra digər mərtəbələrdəki sakinlər də vəziyyət barədə məlumatlandırılmalıdırlar.
Yanğın zamanı və ya yanğın baş verdikdə liftlərdən heç vaxt istifadə edilməməlidir. Bundan əlavə , alov yayıldıqda qiymətli əşyaları xilas etməyə çalışmaq, sağ qalmaq şansını azaldır.
Evdə yanğınsöndürən balon saxlanılmalıdır.
Elektrik sistemlərinin həddindən artıq yüklənməsindən, icazəsiz müdaxilələrdən, mətbəx sobalarından və qaz xətlərindən yarana biləcək risklərə qarşı diqqətli olmaq vacibdir.
Buna görə də hər evdə portativ yanğınsöndürən olmalıdır. Yataqda siqaret çəkmək olmaz və siqaret kötüklərini hər ehtimala qarşı su ilə söndürmək məsləhətdir. Elektrik cihazlarının istifadəsi də yanğınların qarşısını almaqda vacibdir. Elektrik cihazları yalnız nəzərdə tutulduğu məqsəd üçün istifadə edilməli və düzgün şəkildə rozetkalara (elektrik yuvaları) qoşulmalıdır. Evdə yanğın siqnalizasiya sistemləri quraşdırılmalıdır. Bu dedektorların (yanğının mövcudluğunu müəyyən etmək üçün nəzərdə tutulan xüsusi elektron cihazlar) aktiv və işlək olduğundan əmin olun.
Qapınızı isladın
Bəzi hallarda yanğın siqnalizasiya sistemi işləməyə bilər. Çoxmərtəbəli binada yaşayan və oxşar hadisə ilə qarşılaşan, son anda yanğının aşağı mərtəbələrə yayıldığını anlayan biri əvvəlcə panikaya düşmədən vəziyyəti qiymətləndirməlidir. Əvvəlcə yanğının olduğu mərtəbəni və çıxış qapısında alov olub-olmadığını yoxlayın.
Əgər mənzilinizin qapı dəstəyi və ya qapı səthi isti olarsa, bu, yanğının qapıya çatdığını göstərir. Qapını açmamaq və islatmaq yanğının yaşayış məkanınıza daxil olmasının müvəqqəti olaraq qarşısını alacaq. Əgər hələ də tüstüdən qaçmaq məcburiyyətindəsinizsə, döşəmədəki tüstü təbəqəsindən sürünərək binadan təcili çıxış yolu ilə çıxmaq mümkün ola bilər. Bu zaman paltarlarınızın istilikdən yanmasının qarşısını almaq vacibdir. Buna görə də, mümkün olduqda, tüstüdən nəfəs almaq üçün paltarlarınızı isladın və burnunuzu yaş dəsmal ilə örtün.
Hər qabı su ilə doldurun.
Təcili çıxış mümkün deyilsə, sakit qalmaq vacibdir. Yanğından ən az təsirlənən və ya təsirlənmə ehtimalı olan otağa girmək vacibdir. Evdəki hər qabı, o cümlədən vannanı su ilə doldurun. Bu, yanğınsöndürənlər gələnə qədər dəstək olacaq.
Evdə alovu yaya biləcək ventilyatorlar kimi əşyalar varsa, söndürülməlidir. Evdəki ən az təhlükəli otağa keçin, qapını bağlayın və xalça, kilim, yastıq və yorğan kimi əşyaları qapının altına və yanına qoyun. Bu, otağa hava axınını minimuma endirir. Tüstü otağa girməyə başlayarsa, qapıları bağlamaq üçün istifadə edilən əşyalar nəmləndirilməlidir.
Otaq tüstü ilə dolduqda, döşəmə səviyyəsinə doğru əyilməlisiniz. Bu, nəfəs almağı asanlaşdıracaq, çünki tüstü yuxarı qalxacaq.
Pəncərədən ağ parça yelləyin
Lazımi tədbirləri görüb xilas edilməyi gözlədikdən sonra pəncərədən ağ parça yelləmək yanğınsöndürənlərin diqqətini yanğının olduğu tərəfə yönəltməyə kömək edir.
Yanğın zamanı panikaya qapılmaq əvəzinə soyuqqanlılıq və maarifləndirmə önəmlidir. Sadə, lakin təsirli yanğınsöndürmə addımları həm sizin, həm də yaxınlarınızın təhlükəsizliyini təmin edə bilər. Unutmayın, yanğınla mübarizə ilk 60 saniyədə başlayır – bu zaman düzgün davranmaq həyatı xilas edə bilər!
