Bento tortu Cənubi Koreyanın dəbli desertidir. Sadə bəzəkləri və sevimli yazıları olan bu inanılmaz tortlar indi bütün dünyada məşhurdur. Bento tortun növü deyil, ölçüsüdür. Termin Yaponiyadan gəlir, burada “bento” sözü bir nəfər üçün, özüylə götürmək üçün əlverişli olan yemək qutusuna aiddir.
Bento tortu, vacib bir gündə və ya sadəcə ona görə verilə bilən qutuda kiçik bir tortdur. Adətən gülməli təsvirlər və ya sevimli yazılarla bəzədilir. Belə bir tortu özünüzlə götürüb istənilən yerdə, hətta parkdakı skamyada da yeyə bilərsiniz. Təbii ki, bento tortu şirniyyat mağazasında satılır. Ancaq bunu ev şəraitində öz əllərinizlə hazırlamaq özünüz üçün də maraqlıdır. Evdar.az ev şəraitində bento tortun reseptini təqdim edir.
Bento tortunun tərkibi:
2 ədəd 10 sm-lik biskviti üçün:
- 2 ədəd yumurta
- 50 qr (2 xörək qaşığı) şəkər tozu
- 1 çimdik duz
- 1/2 çay qaşığı vanil
- 60 qr ( 1/2 stəkan) un
Kremi üçün:
- 300 qr krem pendir
- 100 qr kərə yağı
- 70 qr (3 xörək qaşığı) şəkər tozu
- qida boyası
Bento torttunun hazırlanma qaydası:
Biskviti hazırlamaq üçün ilk öncə yumurtalara bir çimdik duz əlavə edib mikserlə yaxşıca çırpın. Mikser işləyərkən şəkər tozunu nazik bir axınla əlavə edin. Bərk bir ağ kütlə alınana qədər bir neçə dəqiqə çırpın. Ələnmiş unu və vanili də əlavə edib yuxarıdan aşağıya bir spatula ilə yumşaq bir şəkildə qarışdırın. Diametri 12-15 sm olan 2 ədəd dairəvi qəliblərə yağlı kağız sərin. Hazır xəmiri qəliblərə bölüşdürün. Əvvəlcədən 180 dərəcədə 15-30 dəqiqə bişirin (vaxt qəlibin ölçüsündən və biskvitin hündürlüyündən asılıdır). Bişən biskvitləri qəlibdən çıxarıb tamamilə soyudun.
Kremi hazırlamaq üçün bir qabda otaq temperaturunda yumşaldılmış kərə yağıyla şəkər tozunu mikserlə yaxşıca çırpın. Üzərinə krem pendiri də əlavə edin və yaxşıca qarışdırın. Lazım gələrsə, kremi bir neçə hissəyə bölün və qida boyası ilə rəngləyin.
Soyuyan biskvitləri meyvə və ya giləmeyvə suyu, şərbət, süd, qəhvə və ya şəkərli su ilə isladın. Tortu klassik üsulla yığmaq olar : biskvitlərin arasına krem yaxıb, sonra yan hissələri və üzərini kremlə örtün.
Tortun üzərindəki yazı və rəsmi qida boyası ilə rənglənmiş kremlə edə bilərsiniz . Əvvəlcə konturları diş çubuğu ilə çəkmək, sonra konditer torbasından istifadə edərək onları kremlə doldurmaq rahatdır. Bir tortu kremlə bəzəmək çətin bir iş kimi görünürsə, giləmeyvə və ya qənnadı səpmələrindən istifadə edə bilərsiniz. Seçdiyiniz bəzəklərdən asılı olmayaraq, onları çox həcmli etməyin. Axı, bento tortunu kiçik bir qutuya yığmaq lazımdır.
Əlavə qeyd:
- Bento tortu üçün çırpılmış kremə əsaslanan yüngül kremlər uyğun deyil, çünki onlar tez formalarını itirirlər. Hamar bir yazı yazmaq və ya belə bir krem ilə bir şəkil çəkmək alınmayacaq. Buna görə də formasını yaxşı saxlayan yağ və ya qaymaqlı pendir əsasında qatı kremlər seçmək lazımdır. Kremin tətbiqini asanlaşdırmaq üçün onu bir neçə saat soyuducuya qoyun.
- Tortun üzərini bəzədikdə, şəxsi hədiyyə olduğundan, yalnız sizin və sevdiyiniz şəxsin başa düşülən zarafatlardan və ifadələrdən istifadə edə bilərsiniz.
- Bento tortu evdən kənarda yeyilir, ona görə də qutuya birdəfəlik qaşıq əlavə edin. Doğum günü tortu versəniz, bir şam və kirbit əlavə edə bilərsiniz.
Nuş Olsun!