Asan Hazırlanan Yumşaq Çiyələkli Keks

Təzə çiyələklərin mövsümü bitməmiş yumşaq və ləzzətli keks hazırlaya bilərsiniz. Evdar.az saytı asanlıqla hazırlaya biləcəyiniz çiyələkli keks reseptini təqdim edir.

Asan Hazırlanan Yumşaq Çiyələkli Keksin tərkibi:

• 2 ədəd yumurta
• 0.5 stəkan şəkər tozu
• 0.5 stəkan maye yağ
• 0.5 stəkan un
• 1 stəkan süd
• 1 paket qabartma tozu

Qəlibi yağlamaq üçün:

• 1 çay qaşığı kərə yağı

Üzəri üçün :

• 1 paket şant krem
• 1 stəkan süd
• 10-12 ədəd çiyələk

Asan Hazırlanan Yumşaq Çiyələkli Keksin hazırlanma qaydası:

İlk öncə bir qabda 2 ədəd yumurta və şəkər tozunu mikserlə yaxşıca çırpın. Üzərinə 1 paket qabartma tozu, 1 stəkan süd, yarım stəkan maye yağı əlavə edib çırpmağa davam edin. Daha sonra hazır olan kütləyə yarım stəkan unu ələyin. Taxta qaşıqla və ya spatulayla ehtiyyatla qarışdırın. Kek qəlibini (baton formalı) kərə yağıyla yağlayın. Hazır kütləni qəlibə töküb əvvəlcədən 170 dərəcə qızdırılmış sobada təxminən 45 dəqiqə bişirin. Üzəri üçün bir qabda şanti kremin üzərinə süd əlavə edib mikserlə 3-4 dəqiqə qatlaşanadək çırpın. Bişib soyuyan keksin üzərinə çırpdığınız şanti kremi yaxın. Keksin üzərinə doğranmış çiyələkləri düzün.

Nuş olsun!