Paxlava şirniyyatını sevirsiniz, ancaq çəkinizə nəzarət edirsinizsə az kalorili şəkərsiz paxlava hazırlaya bilərsiniz. Evdar.az şərbətli paxlava reseptlərindən daha az kalorili və daha sağlam olan şəkərsiz paxlavanın reseptini təqdim edir.
Az Kalorili Şəkərsiz Paxlavanın tərkibi:
Xəmiri üçün:
- 2 stəkan tam taxıl unu
- 1 ədəd yumurta
- 3 xörək qaşığı zeytun yağı
- 3 xörək qaşığı süd
- 2 xörək qaşığı qatıq
- 1/2 çay qaşığı duz
- 1 paket qabartma tozu
- 1-2 damcı limon suyu
- 2 xörək qaşığı nişasta
İçlik üçün:
- 8 ədəd bütöv qoz ləpəsi
Şərbəti üçün:
- 3 xörək qaşığı bal
- 2,5 çay qaşığı su
Az Kalorili Şəkərsiz Paxlavanın hazırlanma qaydası:
Xəmiri hazırlamaq üçün dərin bir qaba unu tökün. Üzərinə 1 ədəd yumurta, 2 qaşıq qatıq, 3 qaşıq süd və 2 qaşıq zeytun yağı əlavə edib qarışdırın. Qabartma tozuna 1-2 damcı limon suyu əlavə edib xəmirə əlavə edin. Son olaraq duzu da əlavə edib xəmir yoğurun. Xəmiri desert qaşığı ilə hissələrə bölərək 20 bərabər hissəyə bölüb top halına gətirin. Kündələri nişastanın köməyi ilə nəlbəki böyüklüyündə oxlovla açıb 5 ədəd üst-üstə qoyub 4 dəstəyə bölün. Bu dörd dəstə paxlava qatları olacaq. Daha sonra üst-üstə qoyub 5 ədədi diametri 20 sm dairələr açın. Soba sinisinə yağlı kağız sərib 1 qat yuxa və 1 qat xırdalanmış qoz səpin. Bu qaydayla hazırlayıb paxlava formasında kəsin. Paxlavanı 1 xörək qaşığı zeytun yağı ilə yağlayın. Əvvəlcədən 170 dərəcə qızdırılmış sobada 45 dəqiqə bişirin.
Şərbəti hazırlamaq üçün 2,5 stəkan ilıq suya 3 xörək qaşığı bal əlavə edin və bal həll olunana qədər yaxşıca qarışdırın. Paxlava bişdikdən 5 dəqiqə sonra soyuq şərbətdə isladın. Şəkərsiz paxlavanı şərbətilə süfrəyə verə bilərsiniz.
Nuş olsun!