Ramazanın İftar Menyusu
Qatıqlı Düşbərə Şorbası
Qatıqlı Düşbərə Şorbasının tərkibi:
Xəmir üçün:
- 1 ədəd yumurta
- 1 stəkan ilıq su
- 3 stəkan un
İçlik üçün:
- 300 qr qiymə
- 1 ədəd soğan
- duz, istiot, pul bibər
- 1 stəkan qatıq
- duru yağ
- nanə qurusu
Qatıqlı Düşbərə Şorbasının hazırlanma qaydası:
Xəmiri hazırlamaq üçün bir qabda yumurta və ilıq suyu qarışdırın. Üzərinə unu hissə-hissə ələyib xəmir yoğurun. Xəmirin üzərini örtüb 15 dəqiqə kənarda saxlayın. İçliyi hazırlamaq üçün bir qabda qiymənin üzərinə rəndələnmiş soğan və ədviyyatları əlavə edib qarışdırın. Xəmiri kündələyib unlanmış dəzgahın üzərində oxlovla yayın. Kiçik kvadratlar formasında kəsib içliyi düzüb düşbərələr hazırlayın. Bir qazanda suyu qaynadın. Qaynayan suya düşbərələr yapışmasın deyə çox az duru yağ əlavə edin. Hazır düşbərələri qaynayan suya töküb 15-20 dəqiqə arabir qarışdıraraq bişirin. Başqa bir qabda qatığı yaxşıca çırpın. Düşbərənin suyundan bir çömcə qaşıqla qatığa əlavə edib qarışdırın. İsti qatığı qazana əlavə edib qarışdırın. Kiçik bir tavada yağı əridib nanə qurusu əlavə edin. Nanəli yağı şorbanın üzərinə töküb qarışdırın. Hazır şorbanı isti halda süfrəyə verin. Şorbaya zövqə görə bişmiş noxud əlavə edə bilərsiniz.
Tərəvəzli Bulqur Plovu
Tərəvəzli Bulqur Plovun tərkibi:
- 1 stəkan bulqur (buğda yarması)
- 1 ədəd soğan
- 1 ədəd yerkökü
- 1 stəkan konservləşdirilmiş yaşıl noxud
- 5 xörək qaşığı zeytun yağı
- 2,5 stəkan isti su
- 1 çay qaşığı duz
- cəfəri
Tərəvəzli Bulqur Plovun hazırlanma qaydası:
İlk öncə soğanın qabığını soyub doğrayın. Yerkökünü də kub formasında doğrayın. Qazanı ocağa qoyub zeytun yağı töküb isidin. Qızdırılmış yağa soğanı, yerkökü və suyu süzülmüş konservləşidirilmiş yaşıl noxudu əlavə edib qovurun. Yuyulmuş və süzülmüş bulquru da qazana əlavə edin. Üzərinə su və duz əlavə edib qazanın qapağını örtün. Suyu buxarlanıb bişənə qədər zəif odda bişirin.Bişən bulqur plovunun üzərinə doğranmış cəfəri səpib süfərəyə verə bilərsiniz.
Ramazanın İftar Menyusu
Toyuqlu və Göbələkli Blinçiklər
Toyuqlu və Göbələkli Blinçiklərin tərkibi:
Blinçiklər üçün:
- 800 ml süd
- 200 ml su
- 4 ədəd yumurta
- 1 dolu xörək qaşığı kartof nişastası
- çimdik duz
- 1 xörək qaşığı şəkər tozu
- 6-7 dolu xörək qaşığı un
- 4 xörək qaşışığı bitki yağı
İçlik üçün:
- toyuq filesi
- şampinyon göbələyi
- soğan
- zövqə görə mozarella pendiri
- göyərti
Toyuqlu və Göbələkli Blinçiklərin hazırlanma qaydası:
İçliyi hazırlamaq üçün ilk öncə toyuq filesini suda bişirin. Bişən fileni öz suyunda soyumağa buraxın. Soğanı və göbələyi doğrayıb tavada qovurun. Üzərinə didilmiş toyuq filesini də əlavə edin. Duz, istiot və toyuq filesinin bulyonunun yarısını süzüb əlavə edin. Suyu çəkilənə qədər bişirin. Soyuyan içliyə zövqə görə rəndələnmiş mozarella pendiri və göyərti əlavə edib qarışdırın.
Blinçik xəmirini hazırlamaq üçün bir qabda yumurta, süd, su, kartof nişastası, un, duz, şəkər tozu və bitki yağını yaxşıca qarışdırın. Blinçik xəmirindən çömçə qaşıqla götürüb qızdırılmış tavada bişirin. Bişən blinçikləri içliklə doldurub bükün. Tavaya kərə yağı və ya bitki yağı töküb blinçikləri iki tərəfli yüngül bişirin.
Ramazanın İftar Menyusu
Ağdaş Dovğası
Ağdaş Dovğasının tərkibi:
- 3 litr qatıq
- 1 ədəd yumurta
- 1 xörək qaşığı un
- 2 xörək qaşığı düyü
- 1 dəstə şüyüd
- 1 dəstə keşniş
- 1 dəstə pərpətöyün
- 1 dəstə nanə və ya 1 dəstə dağ keşnişi
- 1 dəstə ispanaq
Ağdaş Dovğasının hazırlanma qaydası:
Düyünü əvvəlcədən suda isladın. Qatığı dovğanı bişirəcəyiniz qazana töküb qarışdırın. Kələmi yuyub xırda doğrayın. Xırda doğranmış kələmləri qatığa əlavə edin. Daha sonra yuyulmuş düyü (əvvəlcədən suda isladılmış), yumurta və un əlavə edib yenə qarışdırın. Qazanı ocağa qoyub dayanmadan qarışdırın. Dovğa qaynamağa başladıqda, düyü bişdikdə əvvəlcədən yuyulmuş, xırda doğranmış göyərtini töküb ocağı söndürün. Dovğaya bişirilmiş və qabığı soyulmuş noxudu, duzu əlavə edib qarışdırın. Dovğanı isti və soyuq halda süfrəyə verə bilərsiniz.
Sürprizli “Şelkunçik” Peçenyesinin tərkibi:
Xəmiri üçün:
- 3 ədəd qaynadılmış yumurta sarısı
- 80 qr otaq temperaturunda yumşaldılmış kərə yağı
- 1-2 xörək qaşığı şəkər tozu
- 2 xörək qaşığı xama
- 1 çay qaşığı qabartma tozu
- 1-2 paket vanil
- 2 stəkan un
Bulamaq üçün:
- 30 qr kərə yağı
- 3 xörək qaşığı şəkər tozu
- 2 xörək qaşığı süd
Üzəri üçün:
- 1 stəkan xırdalanmış qoz ləpəsi
Sürprizli “Şelkunçik” Peçenyesinin hazırlanma qaydası:
Xəmiri üçün ilk öncə qaynadılmış yumurta sarısını çəngəllə əzin. Üzərinə otaq temperaturunda yumşaldılmış kərə yağını əlavə edib yaxşıca qarışdırın. Şəkər tozu və xamanı da əlavə edib qarışdırın. Qabartma tozu, un və vanili ələyib xəmir yoğurun. Xəmirdən qoz böyüklüyündə kündələr hazırlayın və orta hissəsinə qoz ləpəsi qoyub yuvarlayın. Bu qaydayla hər kündəyə qoz qoyub peçenyelər hazırlayın. Hazırladığınız kündələri yağlı kağız sərilmiş soba sinisinə aralıqlarla düzün. Əvvəlcədən 180 dərəcə qızdırılmış sobada bişirin. Kiçik bir qazanda süd, şəkər tozu və kərə yağını qarışdırıb ocağa qoyub 3-5 dəqiqə qaynadın. Ocaqdan götürüb soyuması üçün başqa bir qaba köçürün. Bişən peçenyeləri bu qlazura bulayıb xırdalanmış qoz ləpəsinə batırın.
Ramazanın ikinci günü üçün Azərbaycanda oruc vaxtları:
İmsaq (orucun başlanğıcı): 05:47
İftar (orucun açılması): 18:48
Günün duası
اللهم قوِّني فيه على إقامة أمرك، وأذِقني فيه حلاوةَ ذكرك، وأوزعني فيه لأداءِ شكرك، بكرمك يا أرحم الراحمين
Tərcümə:
“Allahım! Bu gündə Sənin əmrlərini yerinə yetirməkdə məni möhkəmləndir, Səni zikr etməyin şirinliyini mənə nəsib et, Sənə şükür etməyə məni ruhlandır. Ey mərhəmətlilərin ən mərhəmətlisi, Öz kərəminlə!”
Ramazanda tox tutan reseptlər Ən Dadlı Kulinariya Saytında!
Allah Tutduğunuz Orucu Qəbul Etsin!